Drejtoria Rajonale e Policisë në Mitrovicën e Jugut ka nisur një fushatë sensibilizuese për përdoruesit e trotineteve elektrikë, me qëllim rritjen e sigurisë në trafik dhe parandalimin e aksidenteve.
Fushata, e cila po zhvillohet gjatë kësaj jave nën moton “Mendo me kokë, ngas me kujdes: trotineti yt, përgjegjësia juaj”, është pjesë e planeve operative dhe aktiviteteve parandaluese të Policisë së Kosovës për sigurinë rrugore.
Sipas policisë, qëllimi kryesor i kësaj iniciative është vetëdijesimi i drejtuesve të trotineteve për rëndësinë e respektimit të rregullave të trafikut, mbrojtjen e sigurisë së tyre personale dhe të pjesëmarrësve të tjerë në komunikacion.
Në kuadër të kësaj fushate, zyrtarët policorë po zhvillojnë takime dhe kontakte të drejtpërdrejta informuese me qytetarët, duke shpërndarë gjithashtu fletushka që përmbajnë rregullat bazë për përdorimin e sigurt të trotineteve në trafik, si dhe masat ndëshkuese të parapara me ligj për shkelësit.
Policia e Kosovës u ka bërë thirrje të gjithë pjesëmarrësve në trafik, e në veçanti drejtuesve të trotineteve, që të respektojnë rregullat e komunikacionit dhe të kontribuojnë në rritjen e sigurisë së përgjithshme në rrugë.
