Me rastin e Ditës Ndërkombëtare të Fëmijëve Viktima të Pafajshëm të Agresionit, Posta e Kosovës ka vënë në qarkullim emisionin e ri filatelik “Engjëjt e Lirisë – shtatorja ‘Leotrimi i vogël’”.\
Ky emision filatelik i kushtohet kujtimit të fëmijëve që humbën jetën gjatë luftës në Kosovë, duke theksuar rëndësinë e ruajtjes së kujtesës historike, respektimit të të drejtave të fëmijëve dhe promovimit të vlerave të paqes.
Pulla postare paraqet shtatoren “Leotrimi i vogël”, e cila i kushtohet Leotrim Ahmetit, emri i të cilit është shndërruar në simbol të kujtesës për fëmijët viktima të luftës në Kosovë.
“Përmes filatelisë, tema dhe ngjarje me rëndësi historike e shoqërore dokumentohen dhe përcillen te brezat e ardhshëm, duke kontribuar në ruajtjen e kujtesës kolektive dhe promovimin e vlerave universale”, thuhet në njoftim.
Për realizimin e këtij motivi filatelik është përdorur pamja e shtatores “Leotrimi i vogël”, vepër e skulptorit Sabri Behramaj, e siguruar nga Komuna e Skenderajt.
Emisioni filatelik do të jetë në qarkullim postar deri në konsumimin e plotë./teve1.info/
