Një qytetar në Mitrovicë të Veriut ka dorëzuar në Polici një telefon mobil dhe një portofol të gjetur në rrugë, të cilat më pas iu kthyen pronares së tyre.
Siç ka njoftuar Policia e Kosovës, ankuesja kishte raportuar se gjatë qëndrimit në rrugën “Kolashini” në Mitrovicë të Veriut i kishin humbur telefoni mobil dhe portofoli, në të cilin ndodhej edhe një shumë parash.
Më vonë, rreth orës 18:00, në stacionin policor është paraqitur qytetari E.R., i cili ka njoftuar se telefoni dhe portofoli ishin gjetur nga babai i tij.
Sipas tij, babai e kishte udhëzuar që sendet e gjetura t’i dorëzonte në polici, me qëllim që ato t’i ktheheshin pronarit legjitim.
Pas procedurave dhe verifikimeve të nevojshme, zyrtarët policorë kanë identifikuar pronaren dhe i kanë kthyer telefonin, portofolin dhe shumën e parave që ndodheshin në të.
Policia ka falënderuar qytetarin E.R. dhe familjen e tij për veprimin e përgjegjshëm dhe shembullor, duke vlerësuar se raste të tilla kontribuojnë në forcimin e besimit, solidaritetit dhe sigurisë në komunitet./teve1.info/
