Një ngjarje tragjike ka tronditur bregdetin shqiptar në zonën e Ranës së Hedhun në Shëngjin, ku dy të rinj nga Kosova kanë humbur jetën pasi u përfshinë nga dallgët e detit.
Tre persona të tjerë që ndodheshin me ta kanë arritur të shpëtohen dhe po marrin trajtim mjekësor.
Sipas autoriteteve në Lezhë, pesë të rinjtë kishin hyrë në det për t’u larë, por kushtet e pafavorshme detare dhe rrymat e forta i vunë në rrezik. Pas sinjalizimit për ngjarjen, në vendngjarje mbërritën menjëherë shërbimet e emergjencës, Policia Kufitare dhe forcat e Policisë së Lezhës.
Operacioni i shpëtimit u ndihmua edhe nga qytetarë që ndodheshin pranë zonës me mjete lundruese Jet Ski. Pas ndërhyrjes, pesë të rinjtë u nxorën nga deti dhe u dërguan me urgjencë në Spitalin Rajonal të Lezhës.
Megjithatë, për dy prej tyre, Leonit Aliun dhe Jetmir Binakun, përpjekjet e mjekëve rezultuan të pasuksesshme.
Komuna e Drenasit ka shprehur ngushëllime për humbjen e Jetmir Binakut, banor i fshatit Gllobar, ndërkohë, edhe për Leonit Aliun janë publikuar mesazhe prekëse nga të afërmit dhe miqtë në rrjetet sociale.
Nga ana tjetër, ambasadori i Kosovës në Shqipëri, Skënder Durmishi, ka vizituar tre të rinjtë e mbijetuar në spital. Sipas tij, gjendja e tyre shëndetësore është e qëndrueshme dhe ata po vazhdojnë të marrin kujdesin e nevojshëm mjekësor.
