Kryetari i Lidhjes Demokratike të Kosovës, Lumir Abdixhiku, ka bërë të ditur se ka zhvilluar një takim me Presidentin e Këshillit Evropian, Antonio Costa, gjatë vizitës së tij në Prishtinë.
Përmes një postimi në Facebook, Abdixhiku e ka cilësuar takimin si jashtëzakonisht pozitiv, duke theksuar se në fokus të bisedës kanë qenë hapat që Kosova duhet të ndërmarrë në rrugën e saj drejt integrimit evropian.
“Ishte kënaqësi të takojmë sot në Prishtinë, Presidentin e Këshillit Evropian, z. Antonio Costa”, ka shkruar Abdixhiku.
Sipas tij, gjatë takimit është diskutuar për avancimin e procesit të integrimit evropian të Kosovës, përfshirë statusin e kandidatit për anëtarësim në Bashkimin Evropian dhe zbatimin e Planit të Rritjes.
“Përgjatë këtij takimi jashtëzakonisht pozitiv, diskutuam për hapat që do të ndërmarrim në mënyrë që Kosova të ecën përpara drejt integrimit evropian, nëpërmjet statusit të kandidatit për anëtarësim në BE dhe zbatimit të Planit të Rritjes”, ka deklaruar ai.
Abdixhiku ka theksuar se vendi duhet të vazhdojë rrugën euro-atlantike dhe të ndërtojë institucione të qëndrueshme.
“Kosova duhet të jetë aty ku e meriton, në mesin e kombeve të lira evropiane, e për këtë duhen institucione stabile, të përgjegjshme e që zgjedhin rrugën euro-atlantike në çdo rrethanë”, ka shkruar kreu i LDK-së.
