Shqipëria është zgjedhur Presidente e Evropës së Pyjeve (Forest Europe) për periudhën 2026–2030, duke marrë stafetën nga Suedia në drejtimin e platformës më të rëndësishme pan-evropiane për politikëbërjen në fushën e pyjeve.
Lajmin e bëri të ditur kryeministri Edi Rama përmes një postimi në rrjetet sociale, ku e cilësoi zgjedhjen si një sukses të rëndësishëm diplomatik për vendin.
Në të njëjtën kohë, Rama nuk kursen edhe ironinë për kritikët e projektit të investimit në Zvërnec, të cilët kanë ngritur akuza për dëmtimin e mjedisit.
“Po si ka mundësi, që këtë vend të betonit, Paketës së Mafias së Maleve dhe të Konspiracionit Jahudit të zhdukjes së pyllit të Zvërnecit për ta kthyer në geto palestinezësh të spastruar etnikisht nga Gaza, ta mbështesin fuqimisht Gjermania dhe Mbretëria e Bashkuar për këtë zgjedhje kaq domethënëse, ndërsa vendimi të miratohet më në fund pa asnjë kundërshtim, nga asnjë vend anëtar?!”, shkruan kryeministri.
Forest Europe është platforma kryesore pan-evropiane që bashkon 45 shtete dhe Bashkimi Evropian për të përcaktuar drejtimet strategjike të menaxhimit të qëndrueshëm të pyjeve, biodiversitetit pyjor, klimës dhe ekonomisë së gjelbër./rtsh.al
