Policia e Kosovës ka arrestuar tre persona të dyshuar për përfshirje në një rast grabitjeje ndaj një të mituri në Gjakovë, që kishte ndodhur një ditë më parë.
Sipas njoftimit zyrtar, më 1 qershor, rreth orës 18:50, është raportuar se një i mitur, shtetas i Kosovës, ishte sulmuar pas një përleshjeje fizike nga tre persona të dyshuar.
Gjatë incidentit, njëri prej të dyshuarve dyshohet se ka përdorur një thikë, ndërsa viktimës i është marrë edhe një shumë parash.
I mituri është dërguar për trajtim mjekësor, ndërsa gjendja e tij shëndetësore raportohet të jetë stabile dhe jashtë rrezikut për jetën.
Policia bën të ditur se menjëherë pas raportimit të rastit janë ndërmarrë veprime intensive hetimore dhe operative, të cilat kanë çuar në identifikimin, lokalizimin dhe arrestimin e tre të dyshuarve, dy prej të cilëve janë të mitur, ndërsa njëri është i moshës madhore.
Pas intervistimit dhe përfundimit të procedurave policore, me vendim të prokurorit të shtetit, të dyshuarit janë dërguar në mbajtje.
Drejtoria Rajonale e Policisë në Gjakovë ka theksuar se mbetet e përkushtuar në luftimin e veprave penale dhe garantimin e sigurisë për të gjithë qytetarët, ndërsa hetimet për rastin po vazhdojnë për të sqaruar plotësisht rrethanat e ngjarjes./teve1.info/
