Komisioni Qendror i Zgjedhjeve ka përmbyllur pjesën kryesore të përgatitjeve logjistike për zgjedhjet e parakohshme parlamentare që do të mbahen më 7 qershor, ndërsa shpërndarja e materialeve zgjedhore nëpër komuna pritet të nisë të shtunën.
Zëdhënësi i KQZ-së, Valmir Elezi, ka bërë të ditur se fletëvotimet e shtypura në Slloveni tashmë ndodhen në Qendrën e Numërimit dhe Rezultateve, nga ku do të shpërndahen sipas planifikimeve të institucionit.
Sipas të dhënave të KQZ-së, për procesin zgjedhor janë shtypur gjithsej 1,778,300 fletëvotime. Prej tyre, 1,605,000 janë destinuar për vendvotimet e rregullta, 19,450 për votimin me kusht, 13,500 si rezervë dhe 3,500 për votuesit me nevoja të veçanta.
Elezi theksoi se numri i fletëvotimeve është përcaktuar duke u bazuar në pjesëmarrjen e qytetarëve në zgjedhjet e mëparshme, prandaj është më i ulët se numri i përgjithshëm i votuesve të regjistruar.
Sipas planit operacional, materialet zgjedhore do të dërgohen fillimisht në Qendrat Komunale të Numërimit, ndërsa në mëngjesin e ditës së zgjedhjeve do të shpërndahen në qendrat e votimit në të gjithë vendin.
Për votuesit jashtë vendit, KQZ ka shtypur 108 mijë fletëvotime për votimin me postë dhe 28,850 për votimin në përfaqësitë diplomatike të Kosovë. Fletëvotimet për votimin me postë tashmë janë dërguar te qytetarët e regjistruar, ndërsa materialet për misionet diplomatike janë nisur drejt vendeve ku votimi do të mbahet më 6 qershor.
Votimi në diasporë do të organizohet në 30 përfaqësi diplomatike në 18 shtete, ku janë regjistruar 27,724 votues. Ndërkohë, për votimin me postë janë regjistruar 104,488 qytetarë.
Në zgjedhjet e 7 qershorit, procesi i votimit do të zhvillohet në 949 qendra votimi me gjithsej 2,550 vendvotime. Sipas listës zgjedhore, të drejtë vote kanë 1,959,962 qytetarë.
KQZ ka vlerësuar se të gjitha përgatitjet po ecin sipas planit dhe se janë krijuar kushtet për zhvillimin e një procesi zgjedhor të rregullt, të sigurt dhe transparent.
