Efektivi i policisë private, G. Biba, është lënë në burg pasi akuzohet për dhunë ndaj një protestuesi gjatë tubimit të zhvilluar më 30 maj në Zvërnec, ku banorët po kundërshtojnë ndërtimin e një resorti turistik.
Gjykata e Shkallës së Parë në Vlorë, me gjyqtar Etien Isak, vendosi masën e sigurisë “arrest në burg” ndaj 32-vjeçarit, shkruan RTSH.
Pas shqyrtimit të provave dhe dëgjimit të palëve, prokuroria kërkoi caktimin e masës “arrest në burg”, kërkesë që u pranua nga gjykata. Biba, banues në Durrës, dyshohet për veprat penale “Heqja e paligjshme e lirisë” dhe “Plagosja e lehtë me dashje”.
Sipas hetimeve paraprake, ai, në bashkëpunim me dy shtetas të tjerë, A. G. dhe G. V., të cilët po ashtu janë proceduar penalisht, ka ushtruar dhunë ndaj një qytetari gjatë protestës së banorëve të Zvërnecit dhe më pas e ka tërhequr me forcë drejt zonës së rezervuar për rojet, duke i shkaktuar dëmtime të lehta trupore.
Ngjarja mori vëmendje të gjerë publike pas publikimit të pamjeve filmike, ku Biba shfaqet duke tërhequr zvarrë shtetasin E. S. gjatë protestës së mbajtur më 30 maj në zonën e njohur si “Portonovë”.
Ndërkohë, Drejtori i Përgjithshëm i Policisë së Shtetit ka urdhëruar nisjen e një hetimi disiplinor për të gjithë zinxhirin komandues të Drejtorisë Vendore të Policisë Vlorë, për të verifikuar masat e marra dhe mënyrën e menaxhimit të tubimit.
