Kandidati i Partisë Demokratike të Kosovës për kryeministër, Bedri Hamza, ka prezantuar planet e tij për sektorin e energjisë, duke premtuar se një nga prioritetet kryesore të qeverisë së tij do të jetë integrimi i Kosovës në rrjetet rajonale të gazit natyror.
Sipas Hamzës, vendi ka humbur mundësi të rëndësishme për diversifikimin e burimeve energjetike, ndërsa ka vazhduar të përballet me kosto të larta të importit të energjisë elektrike. Ai ka theksuar se Kosova mbetet jashtë rrjeteve të gazit natyror në rajon, situatë që, sipas tij, ka ndikuar në rritjen e varësisë nga importet.
Hamza ka deklaruar se, nëse merr drejtimin e qeverisë, do të nisë procedurat për lidhjen e Kosovës me korridoret rajonale të gazit, duke synuar shfrytëzimin e mundësive që ofrojnë projektet energjetike në rajon dhe forcimin e bashkëpunimit me Shtetet e Bashkuara të Amerikës në këtë fushë.
“Sot, Kosova mbetet i vetmi vend i Ballkanit Perëndimor që nuk është i lidhur me rrjetet e gazit natyror. Ndërkohë, gazsjellësi Aleksandrupoli–Shkup do ta sjellë LNG-në amerikane vetëm rreth 15 kilometra larg kufirit të Kosovës, duke krijuar një mundësi reale që nuk duhet humbur”, ka shkruar ai në Facebook.
