Me rritjen e temperaturave, rritet edhe rreziku i sëmundjeve të lidhura me nxehtësinë, si helmimi nga dielli, lodhja nga nxehtësia dhe goditja nga nxehtësia.
Problemet e lidhura me nxehtësinë mund të ndodhin më shpejt nga sa mendojnë njerëzit, sidomos në temperatura ekstreme ose gjatë aktivitetit fizik, thotë Adam D. Blumenberg. Lajmi i mirë është se shumica e rasteve mund të parandalohen me masat e duhura.
Dr. Blumenberg shpjegon se çfarë mund të bëni për t’u mbrojtur gjatë periudhave me vapë ekstreme dhe valë të rrezikshme të të nxehtit.
Kush është më i rrezikuar nga sëmundjet e lidhura me nxehtësinë?
Nxehtësia ekstreme është veçanërisht e rrezikshme për:
fëmijët,
të moshuarit,
gratë shtatzëna,
personat me sëmundje të zemrës,
dhe ata që marrin medikamente të caktuara (si antihistaminikë, disa antidepresivë dhe diuretikë).
Disa medikamente dhe sëmundje e bëjnë më të vështirë për trupin të rregullojë temperaturën, thotë Dr. Blumenberg. Prandaj disa njerëz janë më të ndjeshëm ndaj vapës ekstreme.
Gjatë një vale të nxehti, është thelbësore të njihni simptomat e lodhjes nga nxehtësia dhe goditjes nga nxehtësia.
Cilat janë simptomat e lodhjes nga nxehtësia?
Lodhja nga nxehtësia ndodh kur trupi mbinxehet për shkak të temperaturave të larta dhe dehidratimit. Shenjat më të zakonshme përfshijnë:
Djersitje të tepërt
Lodhje ose dobësi
Marramendje
Dhimbje koke, të përziera ose të vjella
Ngërçe muskulore
Rrahje të shpejta të zemrës
Ndjenjë të fikëti ose afër fikëtit
Lodhja nga nxehtësia është sinjali paralajmërues i trupit, thotë Dr. Blumenberg.
Nëse vini re këto simptoma, është e rëndësishme të ndaloni, të freskoheni dhe të hidratoheni menjëherë.
Marrja e këtyre masave menjëherë është thelbësore për të parandaluar përkeqësimin në goditje nga nxehtësia.
Cilat janë simptomat e goditjes nga nxehtësia?
Goditja nga nxehtësia është një emergjencë mjekësore serioze që mund të rrezikojë jetën ose të shkaktojë dëmtime të përhershme në organe si veshkat dhe mëlçia.
Simptomat përfshijnë:
Temperaturë shumë e lartë trupore (mbi 39.4°C)
Konfuzion ose ndryshim i gjendjes mendore
Dhimbje koke e fortë
Frymëmarrje e shpejtë dhe sipërfaqësore
Rrahje të shpejta të zemrës
Lëkurë e kuqe, e nxehtë dhe e thatë
Të përziera, të vjella ose diarre
Kriza epileptike
Humbje e vetëdijes
Goditja nga nxehtësia mund të bëhet kërcënuese për jetën shumë shpejt,” thotë Dr. Blumenberg.
“Nëse dikush është i hutuar ose bie pa ndjenja, kërkoni menjëherë ndihmë emergjente.
Goditja nga nxehtësia mund të zhvillohet brenda pak orësh pas aktivitetit fizik në vapë ekstreme, ose gradualisht gjatë disa ditëve në ambiente shumë të nxehta pa ajër të kondicionuar.
Si ta ulni rrezikun e kancerit të lëkurës
Dermatologia Alexandra Coromilas rekomandon të tregoni kujdes, sidomos nëse kaloni shumë kohë në diell.
Si të parandaloni lodhjen nga nxehtësia?
Vapa ekstreme kërkon masa të veçanta paraprake për të shmangur probleme si skuqja nga nxehtësia, djegiet nga dielli, lodhja apo goditja nga nxehtësia.
Këshilla për sigurinë në mot të nxehtë:
Planifikoni aktivitetet me kujdes: Bëni ecje apo aktivitete jashtë në orët më të freskëta, si herët në mëngjes ose në mbrëmje.
Qëndroni të hidratuar: Pini shumë ujë. Shmangni alkoolin, kafeinën dhe pijet me shumë sheqer.
Vishuni lehtë: Përdorni rroba të lehta, të lirshme dhe me ngjyra të çelëta. Vendosni kapelë dhe syze dielli.
Përdorni krem kundër diellit: Zgjidhni krem me mbrojtje të lartë SPF dhe riaplikojeni çdo dy orë.
Kërkoni hije: Pushoni në vende me hije ose ambiente të freskëta.
Përdorni mjete freskuese: Ventilator portativ, peshqir freskues ose një shall të lagur në qafë.
Mos e teproni me aktivitetin: Pushoni shpesh dhe dëgjoni sinjalet e trupit.
Kujdes me ushqimin: Shmangni ushqimet që prishen shpejt në temperatura të larta.
Qëndroni në kontakt: Informoni familjarët për planet tuaja dhe mbani telefonin të karikuar.
Vizitoni qendra freskimi: Të moshuarit dhe personat në rrezik duhet të qëndrojnë në ambiente me ajër të kondicionuar.
Çfarë ndihme të parë duhet dhënë?
Nëse dyshoni se dikush po përjeton lodhje ose goditje nga nxehtësia:
Telefononi urgjencën.
Çojeni personin në hije.
Freskojeni me ujë të ftohtë dhe ajroseni.
Hiqni rrobat e tepërta.
Vendosni kompresa të ftohta në qafë, sqetulla dhe ijë.
Kontrolloni frymëmarrjen, pulsin dhe vetëdijen.
Jepini gllënjka të vogla ujë nëse është i vetëdijshëm.
Jepni qetësi dhe mbështetje.
Ndërsa vera bëhet më e nxehtë, kujtoni se parandalimi i emergjencave nga nxehtësia fillon me përgatitjen.
Veprimi i hershëm mund të bëjë një ndryshim të madh në parandalimin e komplikimeve, thotë Dr. Blumenberg.
