Zëvendëskryeministrja Donika Gërvalla në mbledhjen e së hënës u shpreh se marrja e vendimeve të tilla do të kontribuojë në vazhdimësinë e bashkëpunimit të ngushtë me Shtetet e Bashkuara të Amerikës dhe Bashkimin Evropian.
“Këto sanksione përfshijnë: masa kufizuese të eksportit në lidhje me mallrat dhe teknologjinë me përdorim të dyfishtë, si dhe mallrat dhe teknologjinë që mund të kontribuojnë në përmirësimin teknologjik të sektorit të mbrojtjes dhe sigurisë së Rusisë. Masa kufizuese që ndalojnë investimet e reja në sektorin energjetik rus. Si dhe një kufizim gjithëpërfshirës i eksportit në pajisjet, teknologjinë dhe shërbimet për industrinë e energjisë në rusi”, ka deklaruar Gërvalla.
Në mbledhjen e së hënës Qeveria e Kosovës miratoi përbërjen e re të Bordit të Fondit të Sigurimeve Shëndetësore. Pasi nga marsi i 2022-s, nuk kishte bord funksional.
E Qeveria e Kosovës njoftoi se edhe këtë vit do të mbulojë koston e policës kufitare për mërgatën.
“E për të lehtësuar këtë, edhe sivjet, Qeveria e Republikës së Kosovës do të mbulojë koston e policës kufitare për bashkatdhetarët tanë. Procedura vazhdon të jetë e thjeshtë dhe nuk merr shumë kohë. Polica mund të blihet edhe fizikisht në pikat kufitare hyrëse, për të evituar pritjet në kufi ajo mund të blihet edhe online para se të niseni. E pasi ta kenë blerë bashkatdhetarët tonë policën, ata mund të aplikojnë për rimbursim të pagesës në formularin po ashtu online të Ministrisë së Financave”, ka njoftuar Kurti.
Po ashtu, Kurti shtoi se është duke u pilotuar alternativa kulturore për komunitetin shqiptar dhe jo-shqiptar jashtë vendit, në mënyrë që të ketë ndërlidhje me komunitetin edhe përmes artit dhe kulturës.
Ndërsa ministrja e Arsimit Arbërie Nagacvi, ka njoftuar se edukimi parafillor do të bëhet i obliguar nga viti shkollor 2023-2024.
Raporti i gazetarit, Bashkim Bekolli.
