Ushtruesja e Detyrës së Presidentes së Republikës së Kosovës, Albulena Haxhiu, ka bërë sot homazhe në varrezat e qytetit të Pejës, në përkujtim të pesë anëtarëve të familjes Kastrati dhe fqinjit të tyre, të cilët u vranë më 28 maj 1999.
Në këtë ngjarje përkujtuese u nderuan Sokol (Çelë) Kastrati, Xhafer (Çelë) Kastrati, Valdet (Sokol) Kastrati, Adrian (Xhafer) Kastrati dhe Alban (Xhafer) Kastrati, si dhe Hasan (Emrush) Muratagiqi, të cilët, sipas autoriteteve, u vranë nga forcat serbe gjatë periudhës së luftës në Kosovë.
Haxhiu ka theksuar se, ndonëse drejtësia për këto krime ende mungon, kujtimi dhe sakrifica e të rënëve për liri mbeten të përjetshme.
