Policia e Kosovës, përkatësisht Drejtoria për Bashkëpunim Ndërkombëtar Policor, në koordinim me njësitet relevante dhe institucionet e drejtësisë, ka realizuar të mërkurën ekstradimin e një shtetasi kosovar nga Zvicra në Kosovë.
Sipas njoftimit zyrtar, i dyshuari ishte arrestuar nga autoritetet zvicerane, pasi kërkohej përmes INTERPOL-it me letër rreshtimi ndërkombëtar të lëshuar nga institucionet e drejtësisë së Kosovës për veprën penale “Dhunim”.
Ai dyshohet se i ishte shmangur drejtësisë.
Ekstradimi është realizuar në bazë të ligjeve në fuqi dhe bashkëpunimit ndërmjet institucioneve të Republikës së Kosovës dhe atyre zvicerane.
Pas ekstradimit, i dyshuari i është dorëzuar njësitit policor kompetent për vazhdimin e procedurave të mëtejme ligjore.
“Policia e Kosovës përmes Drejtorisë për Bashkëpunim Ndërkombëtar Policor, do vazhdoj me shkëmbimin e informacioneve me institucionet vendore, shtetet dhe organizatat ndërkombëtare me qëllim të parandalimit, hetimit dhe zbulimit të aktiviteteve kriminale që ndërlidhen me hetimin e kryesve të veprave penale, si dhe aktivitete tjera në gjurmimin, arrestimin e personave dhe grupeve kriminale që veprojnë brenda dhe jashtë vendit”, theksohet në njoftim.
