Kandidati i Lidhjes Demokratike të Kosovës (LDK), Paris Guri, ka kritikuar vendimin e Qeverisë në detyrë për ndarjen e 100 eurove për qytetarët, duke e cilësuar atë si “blerje të votës”.
Në emisionin “Ditari” në Tëvë1, Guri është shprehur i bindur se qytetarët e Kosovës nuk ndikohen nga shuma prej 100 eurosh për të votuar një parti të caktuar, duke theksuar se ato para janë “të mirëseardhura”, por duhet të rregullohen me ligj dhe të jepen në mënyrë të rregullt mujore, jo në prag të zgjedhjeve.
Ai ka thënë se, sipas tij, Lëvizja Vetëvendosje (LVV) po përdor një strategji ku, siç është shprehur, për katër vite nuk përmbyllen projekte të mëdha, ndërsa në prag të zgjedhjeve bëhen premtime dhe shpërndarje të mjeteve financiare.
“LVV ka një strategji tash e një kohë që për katër vite nuk e përfundojnë asnjë punë të vetme dhe kur vjen koha e zgjedhjeve japin premtime megalomane dhe shpërndajnë nga 100 euro për qytetarët e Republikës së Kosovës. Do të thotë kjo është puro blerje e votës. Nuk është vështirë me bë zotime, vështirë është me i realizu ato. Unë nuk besoj që populli i Kosovës blihet, unë nuk besoj që populli i Kosovës ndikohet nga 100 euro për ta votuar një parti të caktuar, sepse në fund të fundit ato janë paratë e qytetarëve të Kosovës, ua ka marrë atyre dhe po ua jep atyre. Ai qëllimin e ka të keq, mirëpo qytetari nuk besoj dhe jam i bindur që nuk voton mbi bazën e këtij parimi. Shtesat absolutisht janë të mirëseardhura, mirëpo kjo duhet të rregullohet me ligj dhe të jenë të përmuajshme, e jo të jenë në dëshirën e ministrit që kurdo që afrohen zgjedhjet të tentohet me u ble vota në mënyrë klasike, për arsye se populli i Kosovës në fund të fundit meriton dinjitet”, ka deklaruar ai.
Guri ka theksuar se vendimi për ndarjen e 100 eurove është marrë në kohë të afërt me zgjedhjet e parakohshme të 7 qershorit, duke e cilësuar këtë si veprim të qëllimshëm.
Sipas tij, shuma prej 100 eurosh nuk është e mjaftueshme për të përballuar rritjen e çmimeve dhe inflacionin.
“Këta e lënë ekzekutimin e 100 eurove dy javë para zgjedhjeve, ashtu siç e kanë lënë edhe më 28 dhjetor. Inflacioni në Kosovë nuk është vetëm në muajin maj, ka qenë edhe në prill edhe në mars, dhe kanë mundur ta ekzekutojnë këtë vendim edhe më herët, por e kanë lënë saktësisht dy javë para zgjedhjeve me qëllim. 100 euro nuk e zbusin inflacionin. Me ato 100 euro sot në market nuk mund të blesh as një qese me produkte bazike, aq shumë janë shtrenjtuar çmimet e produkteve bazike”, ka theksuar Guri.
Ai ka shtuar se qëllimi i qeverisë, sipas tij, është pushteti dhe jo mjetet e përdorura për ta arritur atë, duke kritikuar gjithashtu mënyrën e organizimit të zgjedhjeve dhe motivet politike pas vendimeve të fundit.
“Kjo më shumë se frikë e tregon që ata janë të interesuar për pushtet dhe nuk njohin mjete për pushtet për të arritur qëllimin e tyre, e qëllimi i tyre është pushteti. Nuk ka precedent në botë që një parti me 50 për qind e çon vendin në zgjedhje një muaj pasi i merr 51 për qind me dëshirën për t’i marrë 60 e 70 për qind dhe për t’i marrë të gjitha pozitat kryesore të shtetit”, ka përfunduar ai./teve1.info/
