Në mars, punëtorët e sektorit publik morën pagën e 13-të.
Por kryeministri në detyrë, Albin Kurti në këtë fushatë zgjedhore po përmend edhe një pagë më shumë.
Kurti thotë se synon edhe pagën e 14-të për sektorin publik e privat.
“Nga viti 2026 do të nisim përcaktimin me ligj të pagës së 13-të për sektorin publik, por edhe për sektorin privat. Pas dialogut me sektorin privat, synimi ynë është që në bashkërendim me bizneset dhe me punëtorët ta planifikojmë gradualisht edhe pagën e 14-të”, ka thënë Kurti.
Mirëpo këto premtime, nuk e kanë bindur kryetarin e Sindikatës së Administratës Publike, Ali Gashi
“Nuk e di pse kjo është ka ndodhë por unë personalisht nuk e marrë shumë serioze për arsye sepse nuk e di çfarë modeli është kjo paga e 14-të. Na edhe si Federatë po bashkë edhe me sindikatat e tjera në vazhdimësi kemi kërkuar rrijen e vlerës së koeficientit, ne kemi nevojë për rritje të pagave, e pastaj është problemi se si gjinden modalitete tjera për me i dalë krahë punëtorë”, u shpreh Gashi.
Gashi thotë se fillimisht duhet të rregullohet çështja e pagës së 13-të.
“Pse të mos bëhet edhe paga e 15-të? Mos ta lëmë numrin cift por tek, jo 14 –të siç po thotë kryeministri por 15 paga”, theksoj Gashi.
Me rezerva deklaratat e kryeministrit, i sheh edhe kryesindikalisti i sektorit privat, Jusuf Azemi.
Zgjidhje më e mirë, Azemi thotë se do të ishte rritja e pagave.
“Pronarët e kompanive aty ku kanë mundësi me i jep nuk kanë nevojë me iu dhanë leje kryeministri fare, por bizneset kanë ardh në atë gjendje që menxi po mbijetojnë e leje të flasim për pagën e 14-të. Andaj nëse ne jemi pjesë e saj, nëse nga buxheti gjithçka çka ndahet barabartë atëherë jemi në diskriminim total”, ka thënë Azemi.
Në Kosovë këtë vit për herë të parë është dhënë paga e 13-të për punëtorët e sektorit publik.
