Ministrja në detyrë e Drejtësisë, Donika Gërvalla, ka vizituar zyrat rajonale të Shërbimit Sprovues të Kosovës në Komunën e Ferizajt dhe Prizrenit, me qëllim njohjen nga afër me punën, sfidat dhe funksionimin e këtij institucioni.
Sipas MPJD-së, gjatë vizitës, Gërvalla ka theksuar rëndësinë e Shërbimit Sprovues në zbatimin praktik të vendimeve gjyqësore, si dhe rolin e tij në rehabilitimin dhe riintegrimin shoqëror të personave që kanë pasur përfshirje në sistemin penal.
“Gjatë takimit me drejtorin e SHSK-së, z. Arsim Tahiri folëm kryesisht për çështje që lidhen me funksionimin e përditshëm, kapacitetet institucionale dhe nevojën për avancim të mëtejmë të kushteve dhe mjeteve të punës, në funksion të përmbushjes sa më efikase të mandatit ligjor të shërbimit”, ka thënë Gërvalla.
Gërvalla ka vlerësuar Shërbimin Sprovues të Kosovës si një hallkë të rëndësishme të sistemit të drejtësisë, që kontribuon në zbatimin e ligjit dhe politikave korrektuese në praktikë./teve1.info/
