Kryetari i Prishtinës, Përparim Rama, ka deklaruar se kryeministri në detyrë, Albin Kurti, ka një deficit të madh politik dhe personal, pasi sipas tij nuk ka dhënë kontribut as në luftën çlirimtare dhe as në ndërtimin e institucioneve të Republikës së Kosovës.
Sipas Ramës, Kurti po përpiqet vazhdimisht ta mbulojë këtë mungesë me propagandë, duke sulmuar figurat e Ushtrisë Çlirimtare të Kosovës si “hajna” e “kriminelë”, si dhe duke tentuar, sipas tij, të përfshijë në diskursin politik familjet më të mëdha atdhetare.
Në një postim në Facebook, Rama ka thënë se në mungesë të rezultateve konkrete, Kurti vazhdon të mbështetet në propagandë.
Sipas tij, “për gjashtë vjet në pushtet, Kurti e ka zhytur vendin në varfëri dhe stagnim, pa asnjë projekt madhor dhe pa rezultate konkrete”.
“Të shohim me çfarë do të vendosë ta vazhdojë fushatën: me kërcënime për jetë, me premtime për mërgatën apo me një tjetër episod propagandistik”, ka shkruar Rama.
Në fund të postimit, Rama i është drejtuar Kurtit duke thënë se qytetarët nuk kanë nevojë për “filma propagandistikë”, por për program, zhvillim dhe mirëqenie.
