Kjo rrugë mëngjesin e sotëm u kthye në tragjedi për një familje nga Peja.
Si shkak i një vetaksidenti, humbi jetën shoferi i veturës, ndërkaq gruaja bashkë me tre fëmijët mbetën të lënduar.
Shoferi i veturës dyshohet se humbi drejtimin mbi mjetin, duke rënë disa metra në këtë vendpunishte në Dollc të Klinës, pjesë e punimeve për rregullimin e rrugës.
Në kohën kur ndodhi aksidenti, dyshimet janë se mungonte sinjalistika e nevojshme.
Këtë informacion janë duke e hetuar në Prokurorinë Themelore të Pejës.
“Në vendin e ngjarjes janë kryer gjitha ekzaminimet e nevojshme, dyshohet që është vetaksident, mirëpo prokurori i shtetit, ka autorizuar ekspertin e komunikacionit, ekspertin nga ministria përkatëse dhe inspektorin e kompanisë së kontraktuar që të dalin në vendin e ngjarjes që të përpilojnë raportin dhe të njejtat ti deponojnë në prokurori dhe varësisht nga raportet e fundit të këtyre eksperteve do të merren vendimet e nevojshme”, ka thënë Nikçi.
Gjatë pasdites, personat përgjegjës janë parë duke vendosur këto shenja të sinjalistikës, të cilat nuk dihet nëse mungonin në orët e para të mëngjesit kur ndodhi vetaksidenti fatal.
E një nga të lënduarit, për shkak të gjendjes kritike, tashmë është transferuar në Spitalin e Shkupit.
Fillimisht që të katër të lënduarit janë trajtuar në spitalin e Pejës.
“Si pasojë e një aksidenti trafiku në spitalin tonë janë pranuar katër persona të lënduar. Pas ofrimit të trajtimit mjekësor një person është dërguar për trajtim të mëtejmë në Qendrën Klinike Universitare të Kosovës (QKUK), ndërsa dy persona pas trajtimit janë liruar për në shtëpi në gjendje stabile. Sipas informacioneve të pranuara nga organet kompetente, një person ka humbur jetën si pasojë e aksidentit, por nuk është sjellë në Spitalin e Përgjithshëm në Pejë”, thuhet në njoftimin e spitalit të pejës.
Gjatë ditës në vendin e ngjarjes janë parë organet e rendit, pasi hetimet për shkaqet e këtij vetaksidenti po vazhdojnë.
