Sirtarët e Forcës së Sigurisë së Kosovës pritet të mbushen së shpejti me armatim të ri amerikan.
Departamenti Amerikan i Shtetit ka njoftuar tashmë Kongresin për një leje për eksportimin e artikujve të mbrojtjes, të dhënave teknike dhe shërbimeve të mbrojtjes drejt Kosovës.
Vlera e armatimit është 14 milionë dollarë.
Tëvë1 ka kërkuar nga Ministria e Mbrojtjes më shumë rreth këtij armatimi, mirëpo deri në publikimin e kronikës nuk ka marrë përgjigje.
E ish-komandanti i FSK-së, Kadri Kastrati po e mirëpret një nismë të tillë nga aleati kryesor i Kosovës.
“Shtetet e Bashkuara të Amerikës po e shohin se forcat tona të armatosura kanë ecur aq largë në aspektin profesional saqë kemi arritur të bëhemi edhe eksportues të sigurisë. Ne si anëtarë i atij Bordit të Paqes që presidentja ishte atje e nënshkruajti atë marrëveshjen, pastaj veç janë në përgatitje ushtarët e Forcës të dërgohen në Gaza”, ka thënë Kastrati.
Sipas Kastratit, kjo nismë jep edhe sinjale për rajonin dhe kërcënimet e Serbisë karshi Kosovës.
“Nuk mund të mbahet me kërcënimet e vazhdueshme të Serbisë që është duke bërë drejt Kosovës dhe drejt stabilitetit rajonal, por një rajon me ushtri të barabarta me një FSK të fuqishme, sigurisht që dërgon sinjale edhe në rajon që ne jemi për një stabilitet dhe një rahati këtu në rajonin e Ballkanit Perëndimor”, ka thënë tutje Kastrati.
Derisa koloneli në pension, Hysen Gecaj, thekson se kjo tregon se Kosova mbetet prioritet nga SHBA-ja si garantues kryesor i sigurisë.
“Ky është një mesazh më i fuqishëm se në të kaluarën, megjithëse mesazhe të tilla nuk kanë munguar as në të kaluarën, por ky është mesazh më i fuqishëm dhe më i qartë, më i drejtpërdrejtë me thënë. Përndryshe mesazhe të tilla ka pasë të drejtime karshi Qeverive të Kosovës, po edhe karshi vet FSK-së drejtpërdrejtë me partneritete të ndryshme, ushtrime të ndryshme të përbashkëta, me mbështetje në ushtrime, trajnime, shkollime”, u shpreh Gecaj.
Shumica e sistemeve të sofistikuara të armatimeve të FSK-së janë nga SHBA-ja, ku vetëm në vitin 2025 arritën dronë dhe autoblinda të blera në SHBA.
Këtë vit pritet të vijnë edhe 200 raketa anti-tank të njohura si “Javelinë”.
