Kryeministri i në detyrë i Kosovës, Albin Kurti ka thënë se këtë vit do të prodhohen municionet e para “Made in Kosova”.
Ai këtë e ka bërë të ditur përmes një postimi në Facebook ku ka ndarë pamje nga fillimi i ndërtimit të fabrikës së municioneve në Jahoc të Gjakovës.
“Bashkë me ministrin Maqedonci në Jahoc të Gjakovës vizituam punishten ku po ndërtojmë fabrikën nga e cila këtë vit do të kemi municionet e para me vulën: “Made in Kosova”.Në hapin e parë historik për vënien e themeleve të industrisë sonë të mbrojtjes do të prodhojmë fishekë të kalibrave 5.56mm dhe 7.62mm, për të vazhduar deri te dronët “Made in Kosova”.Mandatin e kaluar kemi shumëfishuar buxhetin dhe blerjet sikurse kemi rritur kapacitetet njerëzore.Për ushtrinë tonë, gjatë katër viteve të ardhshme do të ndajmë mbi 1 miliard euro, duke siguruar fuqizim, pajisje moderne dhe trajnime të avancuara për forcën tonë të armatosur”, ka shkruar Kurti në Facebook.
