Marta Kos, komisionerja evropiane për zgjerim, ka vlerësuar se viti 2026 mund të shënojë një moment të rëndësishëm për perspektivën evropiane të Kosovës.
Në një postim në platformën X, pas takimeve të zhvilluara në Kosovë, ajo ka theksuar mbështetjen e qytetarëve për integrimin evropian dhe gatishmërinë e Bashkimit Evropian për të avancuar bashkëpunimin me vendin në fusha si ekonomia, demokracia dhe reformat.
Kos ka theksuar se përparimi drejt Bashkimit Evropian kërkon stabilitet institucional dhe bashkëpunim të forcave politike në Kosovë, duke nënvizuar se viti 2026 mund të jetë një mundësi e mirë për hapa konkretë në procesin e integrimit evropian.
“Faleminderit për pritjen e ngrohtë. 88% e popullit të Kosovës beson në perspektivën evropiane të vendit. Ne jemi të gatshëm t’i përgjigjemi thirrjes së tyre për të intensifikuar nivelin e punës për çështjet ekonomike, për përparimin demokratik dhe për reformat. Viti 2026 mund të jetë një moment i mundësive evropiane për Kosovën. Kjo kërkon që forcat politike të bashkohen dhe të gjejnë stabilitet të qëndrueshëm institucional”, shkroi ajo në X. /teve1.info/
