Blerta Deliu e PDK-së ka reaguar për incidentin në Skenderaj ku u sulmua kryetari i degës së Vetëvendosjes në këtë komunë, Hysni Mehani, partia e të cilit tha se kryetari i Skenderajt, Sami Lushtaku, e ka sulmuar fizikisht atë.
Ajo ka thënë se as provokimet, linçimet dhe akuzat sistematike nuk duhet të normalizohen, pasi sipas saj ato kontribuojnë në rritjen e tensioneve shoqërore.
“Dhuna nuk është zgjidhje. Por as provokimet, linçimet dhe akuzat sistematike nuk janë. Sepse kur për vite të tëra instalohet gjuha e urrejtjes, e përçarjes dhe e dehumanizimit, pasojat nuk vonojnë. Njëra e sjell tjetrën. Gjithmonë kështu ka qenë.”
Deliu-Kodra ka apeluar për përmbajtje dhe respekt në jetën publike, duke theksuar nevojën për ndaljen e gjuhës që nxit konflikt dhe përçarje në shoqëri.
“Prandaj, sot më shumë se kurrë, kemi nevojë për përmbajtje dhe respekt në diskursin publik. Për ndalim të gjuhës që prodhon konflikt, e jo për ushqim të saj”./teve1.info/
