Kryeministri në detyrë i Republikës së Kosovës, Albin Kurti, i shoqëruar nga ministrja në detyrë e Kulturës dhe Turizmit, Saranda Bogujevci, si dhe zëvendësministrja Nora Arapi Krasniqi, ka vizituar teatrin “Teatri Adriana” në Ferizaj, ku janë duke u zhvilluar punimet për restaurimin e përgjithshëm të objektit.
Sipas njoftimit të Zyrës së Kryeministrit, Kurti ka thënë se ky teatër konsiderohet një ikonë e qytetit dhe një aset i rëndësishëm i trashëgimisë kulturore, ku ndër vite janë zhvilluar festivale të ndryshme si ai i teatrove, i filmit, i muzikës dhe i këngës “Kosovarja Këndon”, si dhe Festivali i Këngëve për Fëmijë.
Gjatë vizitës, Kurti ka theksuar se punimet përfshijnë restaurimin e brendshëm dhe të jashtëm të objektit, përfshirë kulmin, sallën kryesore dhe oborrin, i cili sipas tij ka nevojë për ndërhyrje të shumta.
Vlera e përgjithshme e investimit, sipas njoftimit, është rreth 1 milion e 163 mijë euro, ndërsa punimet pritet të përfundojnë brenda dy vjetësh, me mundësi për përshpejtim të afateve.
Kurti e ka cilësuar këtë projekt si një lajm të mirë për qytetarët e Ferizajt dhe për artdashësit, duke theksuar rëndësinë e mbështetjes së vazhdueshme për institucionet kulturore.
