Ministrja në detyrë e Drejtësisë, Donika Gërvalla, ka reaguar pas sulmit ndaj zëvendësministrit në detyrë të Financave, Hysni Mehani, dhe kryetarit të Qendrës së Lëvizja Vetëvendosje në Skenderaj, Bahri Zabeli, që ndodhi të enjten në Skenderaj.
Përmes një postimi në Facebook, Gërvalla është shprehur e tronditur nga ngjarja, duke e cilësuar sulmin si të papranueshëm dhe si një goditje të drejtpërdrejtë ndaj institucioneve dhe funksionimit të shtetit të Kosovës, si dhe ndaj procesit zgjedhor.
“Sulme dhe sulmues të tillë i njohim mirë. Synojnë që fushata zgjedhore të jetë e përcjellë nga dhuna, frikësimi dhe logjika e forcës, të cilat nuk kanë vend në Republikën tonë”, ka deklaruar ajo.
Gërvalla ka shtuar se këto janë metoda primitive të betejës politike nga ata që, sipas saj, shtetin e shohin si pronë private dhe sundimin e ligjit si provokim.
Ajo u ka bërë thirrje institucioneve të rendit që të reagojnë menjëherë dhe pa kompromis, duke kërkuar që autorët e sulmit të përballen me drejtësinë pa vonesa.
“Kjo Republikë e ky shtet nuk i nënshtrohet dhunës. Pikë.”, ka përfunduar reagimin e saj ministrja në detyrë, Gërvalla./teve1.info/
