Ministrja në detyrë e Drejtësisë, Donika Gërvalla, ka vizituar Qendrën e Paraburgimit në Prishtinë, ku është pritur nga drejtori i Shërbimit Korrektues të Kosovës (SHKK), Ismail Dibrani, si dhe ushtruesi i detyrës së drejtorit, Salih Ademi, së bashku me drejtuesit dhe stafin e qendrës.
Pas vizitës, Gërvalla ka deklaruar se funksionimi i sistemit korrektues është tregues i drejtpërdrejtë i forcës së shtetit të së drejtës në vend.
Ajo ka theksuar se strukturat si Qendra Operative, Njësia për Vlerësim dhe Klasifikim, Njësia e Transportit dhe Njësia për Inteligjencë Korrektuese përbëjnë boshtin kryesor operacional të sistemit korrektues, duke mundësuar menaxhim të koordinuar dhe efikas të proceseve brenda institucioneve.
Sipas saj, forcimi i koordinimit institucional, rritja e kapaciteteve operative dhe konsolidimi i mekanizmave të sigurisë dhe mbikëqyrjes mbeten prioritete të rëndësishme për avancimin e standardeve në këtë sektor.
“Angazhimi ynë është i pakompromis dhe i pandërprerë për konsolidimin e shtetit të së drejtës, forcimin e besimit në institucione dhe garantimin e sigurisë publike në Republikën e Kosovës”, ka shkruar ajo në Facebook./teve1.info/
