Presidenti i SHBA-së, Donald Trump, ka mbërritur në Pekin, ku do të zhvillojë bisedime dyditore me presidentin kinez, Xi Jinping.
Trump u prit në aeroport nga zëvendëspresidenti kinez, Han Zheng, ndërsa me të në Kinë udhëtuan edhe drejtues të kompanive Nvidia, Apple, Tesla dhe Boeing.
Takimi zhvillohet në një kohë kur tregtia mes SHBA-së dhe Kinës është dobësuar nga tarifat dhe lufta tregtare. SHBA-ja vazhdon të ketë një deficit të madh tregtar me Kinën, pasi importon shumë më tepër mallra sesa eksporton.
Trump synon të rrisë shitjen e produkteve amerikane në Kinë, përfshirë sojën, mishin e viçit dhe avionët Boeing. Drejtori ekzekutiv i Boeing, Kelly Ortberg, tha se ishte “shumë i bindur” për një marrëveshje që mund të sjellë “një numër të madh” porosish të reja avionësh, shkruan BBC.
Përveç tregtisë, Trump tha se lufta me Iranin do të jetë një nga temat kryesore të diskutimeve. Ai përsëriti se Irani nuk do të lejohet të pajiset me armë bërthamore “me asnjë kusht”./teve1.info/
