Mesnata e 12 majit, u caktua si afati i fundit.
Deri në këtë kohë, partitë politike në Kosovë, duhet t’i dorëzojnë listat me emrat e kandidatëve për deputetë.
E emrat e këtyre të fundit, do t’i nënshtrohen procesit të verifikimit.
Këtë e bëri të ditur, zëdhënësi i Komisionit Qendror Zgjedhor, Valmir Elezi.
“Në kuadër të përmbushjes së obligimeve ligjore që kanë të bëjnë me përshtatshmërinë/aftësinë e kandidatëve për certifikim, Komisioni Qendror i Zgjedhjeve, do t’u dërgojë institucioneve relevante kërkesat për verifikim, së bashku me listën e kandidatëve që synojnë të certifikohen për pjesëmarrje në zgjedhje, me qëllim të vlerësimit nëse ata janë në përputhje me nenin 30 të Ligjit për Zgjedhjet e Përgjithshme. Kjo është një praktikë e ndjekur nga KQZ edhe në proceset e kaluara zgjedhore”, ka thënë Elezi.
Tutje, Elezi ka sqaruar se si do të kërkohet verifikimi i emrave të kandidatëve.
“Në mesin e institucioneve nga të cilat KQZ do të kërkojë verifikim të kandidatëve, është edhe Këshilli Gjyqësor i Kosovës. Në nenin 30 të Ligjit për Zgjedhjet e Përgjithshme theksohet se kandidat nuk mund të jetë një person nëse “është dënuar në 3 vitet e fundit me vendim gjyqësor të formës së prerë për vepër penale, me një ose më shumë vjet burgim efektiv”, andaj për zbatimin e këtij kriteri ligjor, KQZ-ja do të kërkojë nga KGjK-ja verifikimin e listës së kandidatëve për të konstatuar nëse ndonjëri prej tyre bie ndesh me këtë kufizim”, ka thënë tutje Elezi.
Ndryshe, ky procesi i verifikimit të kandidatëve pritet të zgjasë disa ditë.
