Qendra e Trepçës, Mustapha Amzil është shpërblyer për paraqitjen e tij të mirë në fitoren kundër Bashkimit, të dielën mbrëma.
Trepça mposhti Bashkimin në duelin e parë të serisë finale të “play-offit”, ndërsa Amzil është zgjedhur më i miri i kësaj ndeshjeje.
Federata e Basketbollit të Kosovës (FBK), të hënën, ka njoftuar se Amzil është shpallur më i miri apo “MVP I Publikut” nga ndjekësit në rrjetet sociale të FBK-së.
Amzil e kishte indeksin më të lartë – 32, pasi për 30 minuta lojë në parket, regjistroi 21 pikë, 14 kërcime dhe 2 asistime.
Ai, gjithashtu ishte shpallur edhe “MVP i Kupës së Kosovës” dhe po del të jetë vendimtar te Trepça edhe në serinë finale kundër Bashkimit.
Trepça këtë sezon ka triumfuar në Kupën e Kosovës, ndërsa po synon ta shpallet kampione për herën e tretë rresht.
