Lidhja Demokratike e Kosovës ka publikuar një mesazh politik me tone bashkuese, duke vënë theksin te rikthimi dhe afrimi brenda subjektit politik, që në përmbajtje përshkruhet si “kthim në shtëpi”.
Në mesazhin e publikuar, LDK-ja e cilëson partinë si shtëpinë politike që ka formuar breza të tërë politikë dhe që ka kultivuar dashurinë për shtetin dhe Republikën e Kosovës.
“Kjo është shtëpia politike që na ka formuar të dyve. Shtëpia që na ka mësuar ta duam Kosovën para vetes”, thuhet ndër të tjera në deklaratë.
Në fund të mesazhit, partia i drejtohet edhe presidentes Vjosa Osmani, duke përdorur shprehjen “mirë se erdhe në shtëpi”, çka është interpretuar si sinjal politik për afrim dhe bashkëpunim.
LDK-ja thekson se ky moment nuk duhet parë vetëm si bashkim politik, por si rikthim te vlerat dhe lidhja e hershme politike që, sipas tyre, i bashkon sërish në të njëjtin rrugëtim.
