Kombëtarja e Kosovës në futboll, në fund të këtij muaji dhe në fillim të muajit tjetër, do t’i luajë dy ndeshje miqësore në kuadër të datave të lira të FIFA-s.
Federata e Futbollit të Kosovës (FFK), të hënën, ka konfirmuar miqësoret me Çekinë dhe Andorrën, ku njërën do ta luajë në udhëtim dhe tjetrën në shtëpi.
Miqësorja e parë e Kosovës, do të jetë ajo kundër Çekisë, e cila do të zhvillohet në stadiumin “Epet Arena” në Pragë, më datën 31 maj.
Ndërkohë, miqësorja me Andorrën, do të luhet më datën 7 qershor dhe atë në stadiumin “Fadil Vokrri” në Prishtinë.
Të dyja këto miqësore, do t’i shërbejnë Kosovës në kuadër të përgatitjeve për sezonin e ri të Ligës së Kombeve, i cili nis në muajin shtator kurse “Dardanët” do të garojnë për herë të parë në Ligën B të kësaj gare.
Çekia do të paraqitet në në Botërorin 2026 dhe aktualisht renditet në pozitën e 41-të në në ranglistën e FIFA-s.
“Dardanët janë përballur me Çekinë deri më tash dy herë dhe atë në kuadër të kualifikimeve për Evropianin 2020. Në ndeshjen e parë më 7 shtator, 2019 kishin fituar në “Fadil Vokrri”, 2:1, derisa në ndeshjen e kthimit në Plzen, pësuan humbje po ashtu 2:1, më 14 nëntor, 2019”, ka shkruar FFK në njoftim.
Edhe me Andorrën, Dardanët janë ballafaquar dy herë në kuadër të kualifikimeve për Euro 2024. Kanë barazuar në Prishtinë (1:1) dhe kanë fituar në Andorra La Vella (3:0).
“Këto dy miqësore do t’i shërbejnë stafit teknik për të vazhduar ndërtimin e skuadrës për ndeshjet e ardhshme me karakter garues në Ligën B, ku Kosova bën pjesë në Grupin B3 me Austrinë, Izraelin dhe Irlandën”, vazhdon njoftimi i FFK.
Kombëtarja e Kosovës do të grumbullohet më datën 27 maj.
