Portierit të skuadrës së Drenicës, Kenan Haxhihamza, i ka takuar epiteti i lojtarit më të mirë për xhiron e fundit në Superligën e Kosovës në futboll.
Federata e Futbollit të Kosovës (FFK), të hënën, ka njoftuar se Haxhihamza është shpallur “Ylli i Javës” për xhiron e 33-të në Superligë.
Vlerësimin e më të mirit, si zakonisht e ka bërë Komisioni i Veteranëve të futbollit, që kanë vlerësuar lart paraqitjen e Haxhihamzës në ndeshjen Drenica – Gjilani.
Haxhihamza ishte vendimtar me pritjet e tij në fitoren shumë të rëndësishme të Drenicës ndaj Gjilanit me shifrat 2:1.
Pasi mori çmimin, Haxhihamza është shprehur i lumtur që u vlerësuar si lojtari më i mirë i javës në Superligë.
Haxhihamza ka pranuar se pritjet e tij kanë ndihmuar ekipin, duke shtuar se ndihet i lumtur, si në aspektin individual, po ashtu edhe në atë kolektiv.
Gjithashtu, Haxhihamza ka thënë se për rezultatet e Drenicës, duhet falënderuar shtabin e trajnerëve dhe kapitenët, ndërsa nuk ka harruar për ta uruar edhe Dritën për titullin e kampionit, duke i dëshiruar suksese në garat evropiane.
Kur kanë mbetur edhe tri xhiro deri në fund të këtij sezoni në elitën e futbollit kosovar, Drenica renditet e gjashta në tabelë me 44 pikë të tubuara.
