Ish-deputeti i Lidhjes Demokratike të Kosovës, Lutfi Haziri, ka deklaruar se skena politike në vend po shkon drejt një përballjeje mes Vjosa Osmani për postin e presidentes dhe Albin Kurti për drejtimin e qeverisë.
Sipas Hazirit, situata politike është krijuar si pasojë e mosnominimit të Osmanit dhe mungesës së marrëveshjes politike për zgjedhjen e presidentit.
“Gara politike do të rikthehet në frymën e vitit 2019. Qytetarët do të vendosin mes Albin Kurtit për qeveri dhe Vjosa Osmanit për presidente. Kjo situatë ka ardhur si rezultat i mos nominimit të Vjosa Osmanit dhe pamundësisë së Kurtit për të negociuar mënyrën e zgjedhjes së presidentit”, u shpreh ai.
Haziri theksoi se për Osmanin është thelbësore rikthimi në institucionet ku ka ushtruar funksione më parë, duke shtuar se sipas tij kjo mund të realizohet vetëm përmes LDK-së.
