Një zjarr i madh ka shpërthyer në orët e hershme të mëngjesit në fshatin Katundi i Ri në Pejë, duke shkaktuar dëme të konsiderueshme materiale në një servis automjetesh.
Sipas raportit 24-orësh të Policisë së Kosovës, rasti ka ndodhur më 8 maj 2026, rreth orës 03:45, kur njësitë policore gjatë patrullimit kanë vërejtur flakët në parkingun e servisit, ku po digjeshin një kamion dhe një autobus.
Në vendin e ngjarjes kanë dalë njësitë relevante policore, zjarrfikësit dhe eksperti i zjarrit për të hetuar rastin dhe për të lokalizuar flakët.
Si pasojë e zjarrit janë dëmtuar pjesa ballore e objektit të servisit, një autobus, një kamion, një pickup dhe dy vetura të tjera.
Policia ka bërë të ditur se ende nuk dihet shkaktari i zjarrit, ndërsa nuk raportohet për persona të lënduar. Rasti mbetet në procedurë hetimore.
“Fsh. Katundi i Ri, Pejë 08.05.2026 – 03:45. Policia gjatë patrullimit kanë vërejtur një zjarr, ku duke u djegur ishte një kamion dhe një autobus në parkingun e një servisi. Njësitë relevante, zjarrfikësit eksperti i zjarrit, kanë dalë në vendin e ngjarjes. Si pasojë e zjarrit janë dëmtuar: një pjesë ballore e objektit, një autobus, një kamion, një pickup dhe dy vetura. Shkaktari i zjarrit ende nuk dihet, nuk ka persona të lënduar, rasti në procedurë hetimore”, thuhet në raportin e PK-së./teve1.info/
