Një zjarr i madh ka përfshirë në orët e hershme të mëngjesit të së premtes një servis automjetesh në fshatin “Katund i Ri” në Pejë, duke shkaktuar dëme të mëdha materiale.
Sipas Policisë së Kosovës, nga zjarri janë përfshirë një kamion, një autobus dhe tri vetura, ndërsa fatmirësisht nuk raportohet për persona të lënduar.
Zëdhënësi i Policisë për Rajonin e Pejës, Fadil Gashi, tha për Tëvë1 se rasti është vërejtur nga policia gjatë patrullimit.
“Në orën 03:54 të ditës së sotme, Policia gjatë patrullimit ka vërejtur zjarrin dhe menjëherë kanë shkuar në lokacion. Në një servis të automjeteve janë kapluar nga zjarri një kamion, një autobus, tri vetura. Dëmet materiale në objekt janë shumë të mëdha. Të lënduar nuk ka, kurse shkaktari ende nuk dihet”, deklaroi Gashi.
Autoritetet kompetente po vazhdojnë hetimet për të zbuluar shkaqet e zjarrit.
