Ministri në detyrë i Punëve të Jashtme, Glauk Konjufca, ka zhvilluar vizitën e tij të parë bilaterale në Irlandë, ku u takua me Ministren për Punë të Jashtme dhe Tregti, Helen McEntee.
Sipas Konjufcës, gjatë takimit është diskutuar për marrëdhëniet ndërmjet Republikës së Kosovës dhe Irlandës, miqësinë mes dy popujve si dhe vlerat e përbashkëta që i lidhin të dyja vendet.
“Ishte vlerësim i përbashkët që raportet tona duhet të zgjerohen dhe intensifikohen në shumë drejtime dhe fusha”, ka shkruar ai në Facebook.
Duke pasur parasysh se Irlanda pritet të marrë presidencën e Bashkimi Evropian, Konjufca ka theksuar se ka kërkuar mbështetjen irlandeze për pranimin e aplikimit të Kosovës për anëtarësim në BE.
Ai ka shtuar se është dakorduar që Kosova nuk mund të veçohet nga procesi i integrimit dhe nga perspektiva e anëtarësimit të vendeve të Ballkanit Perëndimor në Bashkimin Evropian.
Gjatë vizitës, Konjufca është takuar gjithashtu me anëtarë të Komitetit të Përbashkët për Çështjet e BE-së të Parlamentit irlandez, si dhe me senatorin Pat Casey.
Sipas tij, këto takime riafirmuan mbështetjen parlamentare të Irlandës për rrugën evropiane të Kosovës./teve1.info./
