Sot, në mbrëmje do të përcaktohet edhe finalisti i parë i këtij sezoni në Ligën e Kampionëve.
Prej orës 21:00 në stadiumin “Emirates” të Londër, Arsenali do të përballet me Atletico Madridin, në ndeshjen e dytë të fazës gjysmëfinale.
Ndeshja e parë, e luajtur javën e shkuar në Madrid, ka përfunduar 1:1 dhe të dyja skuadrat synojnë ta fitojnë duelin e dytë për ta prekur finalen e madhe.
Arsenali ka një finale të humbur në vitin 2006, ndërsa Atletico Madridi ka humbur finalet evropiane në vitin 1974, 2014 e 2016.
Në fakt, të dyja skuadrat kërkojnë suksesin e parë në Champions, ndonëse fillimisht janë të fokusuara për të bërë vend në finalen e madhe, që do të zhvillohet më datën 30 maj në Budapest.
Arsenali është i motivuar për ta eliminuar Atleticon dhe trajneri Mikel Arteta beson në ekipin e tij, i cili është afër të shpallet edhe kampion i Anglisë pas më shumë se dy dekadave.
Gjithashtu, Arsenali vlerësohet favorit përballë Atleticos në këtë përballje, duke pasur parasysh se “Topçinjtë” i kanë fituar 5 nga 6 ndeshjet e luajtura në shtëpi në kuadër të Ligës së Kampionëve.
