Kryetari i Prishtinës, Përparim Rama ka njoftuar nisjen e një bashkëpunimi të ri politik në Kryeqytet me Partinë Demokratike të Kosovës, me qëllim, siç tha ai, zhvillimin e Prishtinës në të mirë të qytetarëve.
Sipas tij, ky bashkëpunim synon një qeverisje që tejkalon interesat partiake dhe fokusohet në realizimin e projekteve strategjike për Kryeqytetin.
“Po fillojmë një bashkëpunim të ri politik në Kryeqytet edhe me Partinë Demokratike të Kosovës me qëllim zhvillimin e Prishtinës, për të mirën e qytetarëve të saj dhe të Kosovës. Zotohemi për qeverisje që tejkalon interesat partiake, duke vënë në dispozicion kapacitetet profesionale dhe njerëzore për realizimin e projekteve strategjike në dobi të qytetarëve dhe të mirës publike”, ka shkruar Rama.
Rama ka bërë të ditur se në kuadër të këtij bashkëpunimi, nga sot Besianë Musmurati është emëruar në pozitën e Nënkryetares së Kryeqytetit.
Ajo vlerësohet për përvojën e saj institucionale dhe ndërkombëtare në fusha si diplomacia, politika publike dhe menaxhimi institucional.
Rama theksoi se Musmurati ka shërbyer më herët edhe në Kryeqytet, veçanërisht në sektorin e arsimit, ku ka kontribuar në përmirësimin e kushteve për nxënësit dhe mësimdhënësit.
Ndryshe, Lidhja Demokratike e Kosovës sot ka reaguar përmes një komunikate për media, duke mohuar kategorikisht çdo marrëveshje me Partinë Demokratike të Kosovës apo ndonjë subjekt tjetër politik për bashkëqeverisje në Prishtinë./teve1.info/
