Kryeministri në detyrë i Kosovës, Albin Kurti, ka bërë të ditur se procesi i regjistrimit të të porsalindurve tashmë po realizohet në mënyrë digjitale, duke lehtësuar ndjeshëm procedurat për qytetarët.
Sipas tij, qytetarët nuk kanë më nevojë të lëvizin nga një institucion në tjetrin për të përfunduar procedurat që lidhen me regjistrimin pas lindjes së fëmijës, pasi i gjithë procesi po kryhet në mënyrë elektronike.
“Të dhënat për të porsalindurin dhe prindërit regjistrohen në mënyrë digjitale përmes tabletit dhe më pas barten automatikisht në sistemet përkatëse që nga institucioni shëndetësor. Këto të dhëna integrohen në sistemin shëndetësor, regjistrin civil, skemat e benefiteve për fëmijë dhe lehona, si dhe në institucionet e tjera relevante, duke eliminuar nevojën për dokumente fizike dhe aplikime të ndara”, ka shkruar Kurti.
Kurti ka thënë se ky sistem, pas pilotimit të suksesshëm në Gjilan dhe Ferizaj, tashmë ka nisur të zbatohet edhe në Prishtinë, ndërsa pritet të shtrihet së shpejti në Prizren dhe Vushtrri, e më pas në Gjakovë, Pejë dhe në gjithë territorin e Kosovës./teve1.info/
