Aleanca Kosova e Re (AKR) ka njoftuar se Komisioni Qendror i Zgjedhjeve (KQZ) i ka hequr masën e pezullimit, duke i mundësuar rikthimin e plotë në aktivitetin politik.
Sipas njoftimit të partisë, vendimi për pezullim ishte marrë më 12 mars nga Zyra për Regjistrim, Certifikim dhe Kontrollin Financiar të Subjekteve Politike, ndërsa tani është shfuqizuar pasi AKR ka përmbushur të gjitha obligimet ligjore të kërkuara.
AKR thekson se brenda afatit ligjor prej 45 ditësh ka mbajtur Kuvendin Zgjedhor dhe ka realizuar të gjitha procedurat e nevojshme të përcaktuara nga institucionet përkatëse.
Në reagimin e saj, partia e ka cilësuar këtë vendim si një hap të rëndësishëm për konsolidimin institucional dhe politik, duke ritheksuar përkushtimin për funksionim transparent, respektim të ligjit dhe përfaqësim të qytetarëve.
Në Kuvendin Zgjedhor të mbajtur më herët, Emir Abrashi është zgjedhur kryetar i AKR-së, ndërsa partia është themeluar nga Behgjet Pacolli. /teve1.info/
