Shefja e grupit parlamentar të Lëvizjes Vetëvendosje, Arbërie Nagavci, ka akuzuar partitë opozitare për bllokimin e procesit të zgjedhjes së presidentit, duke theksuar se çdo propozim i mazhorancës është refuzuar.
Ajo ka deklaruar se përpjekjet për të shmangur zgjedhjet e parakohshme nuk kanë gjetur mirëkuptim nga opozita, e cila sipas saj ka treguar mungesë të plotë vullneti për zgjidhje.
“Varg refuzimesh. Secilit propozim të LVV-së, opozita iu përgjigj me refuzim. Përpjekja jonë për të shmangur zgjedhjet e parakohshme dhe të panevojshme hasi në një bllokadë të pakapërcyeshme. Në vend të angazhimit konstruktiv, pamë vetëm refuzim dhe mungesë vullneti për zgjidhje.
Kontradiktat e tyre dolën qartë në shesh. Nga PDK, LDK, AAK dhe Lista Serbe pamë refuzim ndaj propozimeve tona, refuzim për të marrë pjesë në votim, refuzim ndaj kandidatëve si Glauk Konjufca dhe Fatmire Kollçaku, si dhe ndaj figurave konsensuale si dr. Feride Rushiti dhe prof. Hatixhe Hoxha. U refuzua edhe bashkëqeverisja, pozita e kryeparlamentarit dhe ajo e presidentit. U refuzua edhe vetë procesi për zgjedhjen e Presidentit.
Të dëshpëruar nga rezultati i zgjedhjeve të fundit, po na çojnë edhe një herë drejt zgjedhjeve të reja. Përgjegjësia për këtë situatë është e qartë dhe qytetarët do ta japin përgjigjen e tyre”, ka deklaruar Nagavci.
Sipas saj, refuzimet e njëpasnjëshme nga opozita kanë qenë faktor kyç që vendi të shkojë drejt një procesi të ri zgjedhor./teve1.info/
