Ministri i Mbrojtjes të Kosovës, Ejup Maqedonci, ka pritur sot në një takim zyrtar anëtarët e Komitetit Ushtarak të NATO-s, të udhëhequr nga Admirali Giuseppe Cavo Dragone, si dhe kryetarin e Komitetit Ushtarak të Bashkimit Evropian (CEUMC), Gjeneral Sean Clancy.
Gjatë takimit, u diskutua për zhvillimet aktuale të sigurisë, avancimin e Forcës së Sigurisë së Kosovës dhe rolin e Kosovës në kontributin për sigurinë rajonale dhe globale.
Maqedonci bëri të ditur se në këtë takim theksoi synimin strategjik të Republika e Kosovës për anëtarësim në Bashkimi Evropian dhe NATO, duke nënvizuar rëndësinë e këtyre proceseve për zhvillimin e vendit dhe stabilitetin rajonal.
“Për më tepër, delegacionin e Komitetit Ushtarak të NATO e informova rreth objektivat strategjike të Ministrisë së Mbrojtjes për katër vitet e ardhshme, të cilat janë fokusuara në zhvillimin e mëtejmë të kapaciteteve të FSK-së, zbatimin e mbrojtjes gjithëpërfshirëse, zhvillimin e industrisë së mbrojtjes, bashkëpunimin ndërkombëtar dhe vetëqëndrueshmërinë”, thotë Maqedonci në postimin e tij në Facebook.
Ministri shtoi se anëtarësimi i Kosovës në strukturat euroatlantike është një hap i domosdoshëm për paqe të qëndrueshme dhe siguri më të fortë në Evropë.
“Republika e Kosovës mbetet e vendosur të ecë përpara si një partner i besueshëm, duke kontribuar aktivisht në sigurinë kolektive dhe mbrojtjen e vlerave që na bashkojnë”
