Shefja e Grupit Parlamentar të Lëvizjes Vetëvendosje, Arbërie Nagavci ka deklaruar se ka pasur kuorum të mjaftueshëm për fillimin e seancës së jashtëzakonshme, duke u bërë thirrje deputetëve që të marrin pjesë në vazhdimin e saj ditën e nesërme.
“Për saktësi, kemi pasur kuorum për të filluar seancën e jashtëzakonshme, sepse seanca ftohet me 40 nënshkrime dhe ishim të pranishëm më shumë se 61 deputetë, që përbën kuorumin e nevojshëm për nisjen e saj,” ka deklaruar Nagavci.
Ajo ka shtuar se për çështjet specifike juridike do të jepen përgjigje në kohë, ndërsa ka theksuar se sipas planifikimit të seancës, synimi ka qenë zgjedhja e Presidentes së vendit.
“Ne filluam një proces të cilin synojmë ta vazhdojmë nesër, me ftesën që edhe deputetët e tjerë të marrin pjesë,” ka thënë ajo.
Nagavci u ka bërë thirrje deputetëve që të jenë të pranishëm në seancën e radhës, me qëllim që të shmangen zgjedhjet e reja dhe të vazhdohet me procesin institucional.
