I pyetur për reagimin e fundit të Vuçiqit pas vendimeve të fundit të Qeverisë së Kosovës, Kastrati tha se presidenti serb dramatizon me çdo situatë.
“Unë kam një frikë, sepse ne tashmë e njohim Vuçiqin, ai është një udhëheqës popullist dhe e dramatizon çfarë do situate. Ai ka një qasje dhe strategji ku te ndërkombëtarët dëshiron t’i fusë ata në borxh edhe në hatër e në raport me Serbinë. Të njëjtën strategji e ka edhe me Republikën Serbe në Bosnjë. Edhe në Kosovë duhet të ketë një kujdes në raport me Perëndimin. Këto sjellje dhe veprime tona mund të na shtyjnë në një grackë”, tha ai në emisionin “Infonata” në Tëvë1.
Qeveria e Kosovës ka marrë vendim që t’ua mundësojë regjistrim me tabela të Republikës së Kosovës të gjithë atyre pronarëve të cilët makinat e tyre i kanë me tabelat e vjetra “PR”, “KM”, “PZ”, “GL”, “UR”, “PE”, “DA” apo “ĐA”.
Një vendim tjetër që është marrë në këtë mbledhje, është që çdo person që paraqitet në kufirin shtetëror të Kosovës me dokument personal të lëshuar nga autoritetet e Serbisë do të pajiset me një dokument (fletë-deklarim) që përkohësisht e zëvendëson përdorimin e një dokumenti të tillë.
Ndaj këtyre vendimeve ka reaguat presidenti serb, Aleksandar Vuçiq. Ai tha se gjithë kjo është përgatitje për një “Stuhi tjetër”, duke iu referuar aksionit të Kroacisë më 1995, kur ky vend çliroi një pjesë të territorit që mbahej nga forcat serbe. Serbia pretendon se më këtë aksion u vranë qindra serbë e u dëbuan mbi 200 mijë të tjerë. /Tëvë1.info.
