Kombëtarja e Holandës ka marrë një goditje në prag të Kampionatit Botëror që këtë verë mbahet në SHBA, Meksikë e Kanada.
Mesfushori ofensiv, Xavi Simons nuk do të jetë pjesë e Holandës në këtë ngjarje të rëndësishme.
Simons do të mungojë në Botëror për shkak të lëndimit të gjurit, që e pësoi vikendin e shkuar në fitoren e Tottenhamit 1:0 ndaj Wolverhaptonit në Premier League.
23-vjeçari ka pësuar këputje të ligamentit kryqëzor dhe do të jetë mungesë e madhe jo vetëm për Holandën por edhe Tottenhamin, ekip që po lufton për mbijetesë në elitën e futbollit anglez.
Simons shkaku i lëndimit nuk pritet të kthehet në fushë deri në vitin e ardhshëm, ndërsa me fanellën e Holandës ka 34 paraqitje dhe 6 gola të shënuar.
Ai verën e shkuar u transferua te Tottenhami, ekip për të cilin ka realizuar 6 gola dhe ka bërë 7 asistime në 43 paraqitje në të gjitha garat.
