Profesori universitar Dashamir Bërxulli ka vlerësuar se deklarimi i kryeministrit Albin Kurti për situatën politike dhe çështjen e presidentit sinjalizon nisjen e fushatës elektorale.
Sipas Bërxullit, në adresimin e tij publik, Kurti nuk ka sjellë elemente të reja, por ka bërë një përmbledhje të zhvillimeve politike të muajve të fundit, duke theksuar narrativën e njohur politike.
“Nisje zyrtare e fushatës elektorale. Kurti përmes adresimit bëri një kronologji të ngjarjeve dhe veprimeve të tij, nuk tha asgjë të re që nuk dihej në publik. Në pesë minuta adresim, përfshiu gjithçka që ka ndodhur këta pesë muajt e fundit, listoi disa fakte dhe disa mendime për qasjen e opozitës. Kjo tregon fillimin e fushatës elektorale dhe i hodhi po ashtu tezat kryesore që do të sillen në fushatë, tezat janë të njëjtat si të vitit 2021. Teza kryesore është që të gjithë janë kundër Kurtit dhe që s’pranojnë të bashkëpunojnë me Kurtin”, deklaroi ai në emisionin “Këndi i Debatit” në Tëvë1.
Profesori universitar thotë se Lëvizja Vetëvendosje nuk ka ofruar vetë një kandidat të qartë për president, por vetëm ka pasur kërkesa karshi opozitës.
“Në adresim nuk tregohet se pse LVV-ja nuk ofron vetë një kandidat konsensual a partiak, ky opsion nuk është shtruar asnjëherë në tavolinë. LVV e ka kërkuar nga opozita të propozojë kandidat, por vetë asnjëherë nuk është shprehur se cili është kandidati i saj”, deklaroi ai.
