Për dallim nga dy vitet paraprake, kur polica e subvencionuar merrej në pikën kufitare, këtë vit ka ndryshuar procedura.
Këtë e bëri të ditur vetë ministri i financave, Hekuran Murati.
“Pasi ta keni blerë policën, ju mund të aplikoni për rimbursim të pagesës në formularin online të Ministrisë së Financave. Polica mund të blihet edhe fizikisht në pikat kufitare hyrëse, mirëpo, që të mos keni nevojë të prisni në kufi, e të mos shkaktohen kolona”, deklaroi Murati.
Megjithatë mërgimtarët nuk janë të kënaqur.
“Sot pagova për një muaj 20 euro, një kohë nuk kemi paguar kur kemi ardhë, tash nuk e di çka ka ndryshuar, kështu që këta e dinë më mirë”, tha një mërgimtar.
“Jam më se i bindur që ka me i realizu premtimet, për arsye se esenca e gjithë kësaj, në vend se me i licensu sigurimi në mënyrë internacionale kanë bërë një farë mënyre sigurim mbi sigurim, institucion mbi institucion”, tha një tjetër.
Për pagesën e policës së sigurimeve ka folur edhe Drejtori i Byrosë së Sigurimeve Sami Mazrekaj.
“Si në çdo shtet të Evropës ku do që ka sigurim, obligohesh me marr sigurim për shkak se është mbulesë për dëmet që munden me u shkaktua është detyrim ligjor, duke e ditur që Qeveria e Kosovës edhe këtë vit ka marrë vendim për me i mbulu shpenzimet për bashkëatdhetarët për pjesën e pagesës këtë vit e kemi apliku në një formë më ndryshe e ajo është që bashkëatdhetarët e marrin pjesën kur të vijnë me pagesë pastaj aplikojnë tek linku të cilën e ka kriju Ministria e Financave për rimbursimin e këtyre mjeteve”, tha Mazrekaj.
Në fund u tha se linku për të aplikuar mërgimtarët për rimbursim të mjeteve do të jetë i aktiv 24 orë.
Raporti i gazetares Furtuna Zejnullahu.
