Ka 16 ditë që ka nisur një rrugëtim me biçikletë nëpër Australi.
Këtë rrugë, Arbert Lybeniqi nga Istogu po e bën me një qëllim të vetëm, t’u ndihmojë fëmijëve dhe të moshuarve me nevoja të veçanta.
Me moton “Një euro për çdo kilometër”, Arberti nisjen e bëri nga Brisbane, e synimi final është Sydney.
Ai thotë se kjo nuk është një aventurë e rastësishme, por vazhdimësi e një pune shumëvjeçare humanitare.
“Iniciativat e mia janë gjitha humanitare për t’u ndihmuar fëmijëve dhe të moshuarve me nevoja të veçanta ku që disa vite me radhë ju kemi ndihmuar këtyre kategorive, se këto kategori kanë shumë nevojë për karroca elektrike, karroca normale, shtretër elektrikë, shëtitore e shumë gjëra të tjera. Nga dhjetori deri në mars kemi dërgu dy kamiona, një nga Gjermania dhe një nga Suedia nëpërmjet shoqatës Humans Bridge ku vetëm në muajin mars u kemi ndihmuar mbi 300 familje me këto mjete” , shprehet Arbert Lubeniqi.
Përgjatë këtij misioni deri tani, ai thotë se nuk ka hasur në probleme.
“Gjatë rrugës deri më tani nuk kam pasur ndonjë problem të madh përpos që dy herë më është dashur të devijoj rrugën për shkak që kanë qenë rrugët e bllokuara dhe për shkak të djegieve të maleve, rrugët kanë qenë të bllokuara”, thotë ai.
Bashkë me Arbertin, në këtë sfidë është edhe shoqëruesi i tij i cili qëndron atje në rast të ndonjë rreziku.
Pavarësisht vështirësive në terren, ai thotë se rrugën e ka vazhduar pa ndërprerje.
“Ushqimin e marrim me veti dhe kur kemi hotele ose restaurante ne qytete ndalemi aty por nëse nuk ka me ato ushqime qe i kemi më veti me ato ushqehemi. Jam me një shoqërues sepse këndej nuk mundesh me bo camping ku të duash vetëm në vende te posaqme për shkak të shtazëve të egra, gjarpërinjëve e shumë të tjera”, thotë Lubeniqi.
Udhëtimi i tij pritet të zgjasë deri më 8 qershor.
