Barcelona do të jetë pa sulmuesin Lamine Yamal për pjesën e mbetur të sezonit, pasi testet e bëra të enjten, konfirmuan lëndimin e kofshës së këmbës.
Yamal u dëmtua në fitoren e Barcelonës 1:0 ndaj Celta Vigos, ndeshje që u luajt të mërkurën mbrëma dhe shënoi golin e fitores nga penalltia.
Ai u detyrua të largohet nga fusha pasi gjuajti penalltinë, duke bërë që Barcelona mos ta ketë në dispozicion deri në fund të sezonit.
18-vjeçari pritet të pauzojë deri në gjashtë javë për shkak të lëndimit, i cili nuk rrezikon pjesëmarrjen e tij me Spanjën në Kupën e Botës.
Shkaku i lëndimit, Yamal do ti mungojë Barcelonës në gjashtë ndeshjet e fundit të këtij sezoni, ku do të përballet me Getafen, Osasunan, Real Madridin, Alavesin, Betisin dhe Valencian.
Në 45 paraqitje këtë sezon në të gjitha garat për Barcelonën, Yamal ka shënuar 24 gola dhe ka bërë 18 asistime.
