Pas gjysmëfinales së parë, të zhvilluar të mërkurën mbrëma ndërmjet Bashkimit dhe Borës, sot në mbrëmje do të luhet gjysmëfinalja tjetër, ajo ndërmjet Trepçës dhe Pejës.
Kjo ndeshje nis në orën 19:30 dhe luhet në palestrën “Minatori” në Mitrovicë, ku përballja mes këtyre dy skuadrave pritet të jetë e fortë dhe me rivalitet të madh.
Sigurisht, Trepça vlerësohet favorite përballë Pejës, skuadër që u kualifikua në gjysmëfinale pasi në serinë çerekfinale eliminoi Golden Eagle Yllin me rezultatin e përgjithshëm 2:1.
Në anën tjetër, Trepça është kualifikuar direkt në gjysmëfinale si kampione e pjesës së rregullt dhe skuadra që regjistron tri fitore në këtë seri, avancon në finale.
Trepça është kampione në fuqi dhe këtë sezon ka triumfuar edhe në Kupën e Kosovës, ndërsa prej 28 ndeshjeve të luajtura xhiron e rregullt, ka regjistruar 25 fitore.
